Tajpejo

»Ni konu la mondon per propraj okuloj.«

Esperantino — Tue, 16 Aug 2011 23:18:13 +0000

Jes, delonge mi ne skribis ĉi tie. Mi iom ne havis tempon, kaj iom mi ne sciis pri kio skribi. Mi ne volis ĝeni iun pri mia privata vivo, krom tio mi ne ŝatas skribi pri ĝi.
Hodiaŭ mi rimarkis, ke unu el miaj amikoj ĉe Fejsbuko metis ligilon al Ĉina Televido en Esperanto Panorame. Pri Ĉina Radio Internacia mi jam sciis antaŭe, sed pri tio, ke ili ankaŭ kreis televidon – ne. La elsendoj estas altkvaltaj kaj plaĉis al mi.

(dankon Bira)

Novaj Esperantaj podkastoj

Esperantino — Mon, 28 Feb 2011 09:28:56 +0000

Hodiaŭ mi ricevis jenan informon pri novaj Esperantaj podkastoj:

- Esperanto-muziko ĉe Radio Vinilkosmo
Ĉu vi ŝatas Esperantan muzikon? Ĉu vi volas aŭskulti kantojn el la
novaj Esperantlingvaj sondiskoj? – Tiam aŭskultu do ofte la programon de
Radio Vinilkosmo! – kiu estas ĝuebla ekde decembro kiel subkanalo de
Esperanto-TV ĉe: http://esperanto-tv.com/vinilkosmo

- Retradio el Varsovio
Kiel sciate, la 31-an de januaro estis ĉesigita la Esperantaj elsendoj de
la pola ŝtata radio. Esperantlingvaj sonraportoj el Pollando tamen ne
malaperis, ja krom la podkasto de Varsovia Vento aperis eĉ nova
son-programo, lanĉita por la fejsbuka grupo “Amikaro de Pola Radio en
Esperanto, APRE” – danke al la persista laboro de Barbara Pietrzak kaj
ŝiaj helpantoj. Feliĉe tiu interreta podkasto estas aŭskultebla kaj
elŝutebla de iu ajn ĉe la adreso: http://retradio.posterous.com

- Voĉoj el Japanio
Je 11.01.2011 estis lanĉita la 1-a elsendo de nova podkasto: “Voĉo el
Japanio”, pli-malpli semajne kompilita, kaj prizorgita de Salih Zakirov. La
podkasto okupiĝas ne nur pri japaniaj politikaj kaj movadaj eventoj, sed
ankaŭ pri kelkaj Esperantaj lingvaj aferoj. La “voĉo el Japanio” estas
aŭkultebla ĉe: http://vej.posterous.com

Listo de ĉiuj Esperantaj radioj/podkastoj:

- http://www.esperanto-tv.com/radio – projekto de Aaron Irvine

- http://podkastaro.org – aranĝita de Wilfred Hughes

Ligilo al unuigita podkasto de Esperanto-elsendoj:
http://www.rssmix.com/u/1822869/rss.xml

Origamio

Esperantino — Wed, 05 Jan 2011 15:13:31 +0000

Miaj japanaj amikoj iam donacis al mi specialajn japanajn paperojn por fari origamion. Kune kun la paperoj estis ankaŭ instrukcioj, kiuj montras kiel faldadi paperon por fari diversajn aĵojn – katon, birdon, ĉevalon ktp. Mi certe provis, sed ne ĉiam sukcesis. Pli facilajn aĵojn mi faris rigardante la instrukciojn, sed pli malfacilajn, kiujn oni faldadis pli komplike, mi ne sukcesis. Pro tio mi iom malvolontiĝis kaj ne plu provis. Antaŭ kelkaj tagoj mi rememoris pri la paperoj kaj iom serĉis en reto. Mi trovis utilajn filmetojn kiel fari origamion paŝo post paŝo kaj mi tuj provis. La rezulton mi fotis kaj jen ĝi:

inicialoj dc

Esperantino — Sat, 18 Dec 2010 18:49:54 +0000

Laste mi trovis novan kanton de Inicialoj dc en reto, “La dimanĉaj fotoj”, kiu ekplaĉis al mi. Ĝi estas el disko “Urbano”. Ankaŭ alian kanton el ĉi tiu disko, “La prembutono”, oni povas aŭskulti senpage. Sed mia la plej ŝatata kanto estas “Hejmen”.

Vintro alvenis

Esperantino — Tue, 30 Nov 2010 16:53:55 +0000

Hodiaŭ nokte neĝis en mia regiono. Mi aŭdis, ke de kelkaj tagoj neĝis en suda Pollando, sed ankoraŭ ne ĉe ni. Kiam mi ellitiĝis, mi ekvidis, ke ĉie estas la neĝo. Kun la neĝo venis ankaŭ frosto. Ne tre granda, ĉar nur -5°C, sed mi sentas ĝin forte pro vento. Jes, la vento estas ofta ĉe ni. Mi ŝatas ĝin somere, sed malŝatas vintre.
Dum lastaj tagoj mi iomete revenis al Dua Vivo. Mi havis longan paŭzon kiam mi ne vizitis ĝin, sed laste mi revenis. Tion, kion mi faris tie, mi skribas en mia profilo ĉe twitpic.

Euforio

Esperantino — Fri, 24 Sep 2010 18:22:16 +0000

La 17-an de aŭgusto en bestoĝardeno en Vroclavo naskiĝis miniatura hipopotamo kaj ĝis hodiaŭ ĝi ne havis nomon. Post ĝia naskiĝo estraro de la bestoĝardeno anoncis konkurson pri la nomo (kiu devu komenciĝi je “E”) kaj hodiaŭ ĝi estas jam konata – Euforio. Preskaŭ esperanta nomo, ĉu? Nur mankas supersigno super “u”.

Fungokolektado

Esperantino — Mon, 20 Sep 2010 11:08:40 +0000

Semajnfine mi vizitis mian amikinon, kiu loĝas en arbargardista domo. La domo situas meze de arbaro, ĉe lago. Belaj vidaĵoj tie estas kaj kia pura kaj sana aero! Mi tre agrable pasigis tempon promenante kaj kolektante manĝeblajn fungojn. Sed mi ne estas bona fungokolektantino, ĉar mi ne ĉiam rimarkas fungojn kreskantajn sur musko aŭ inter falintaj folioj.
Mi faris kelkajn fotojn, kiujn mi metas ĉi tie. Kelkajn aliajn mi metis ĉe Fejsbuko.

Klaku la foton, aperos pli granda.

Kio okazis?

Esperantino — Mon, 03 May 2010 20:53:24 +0000

Hodiaŭ ludante DV-on mi ion misklakis kaj subite tio okazis:

Feliĉe post reensalutiĝo ĉio jam estis en ordo.

Esperanto en lernejoj

Esperantino — Tue, 09 Mar 2010 18:26:22 +0000

Hodiaŭ mi ricevis informon, ke la 4-an de marto en 2010 la vicprezidanto de Pola Sejmo (la malsupera cxambro de la pola parlamento) – Jerzy Szmajdziński akceptis en la parlamentejo esperantistojn: Ilona Koutny, Francisko Witucki, Eduardo Kozyra, Kazimiro Krzyżak kaj Mariano Zdankowski. La esperantistoj prezentis deziron, ke Esperanto ricevu statuson de lingvo, samranga kiel la aliaj fremdaj lingvoj en la pola edukad-sistemo. La vicprezidanto deklaris apogi la iniciativon kaj sugestis, ke la E-grupo proponu al la ministro pri edukado komenci proceduron por la realigo de la prezentita celo.
Jes, se tiu ĉi deziro plenumiĝus, tio estus tre bona afero. Esperanto estus instruataj en lernejoj kaj tiamaniere pli bone konataj. Sed ĉu tio kiam ajn okazos?

WOŚP

Esperantino — Sun, 10 Jan 2010 12:14:50 +0000

Wielka Orkiestra Świątecznej Pomocy (Granda Orkestro de Festa Helpo) estas granda karitata kampanjo en Pollando. Ĝi funkcias de la jaro 1993 kaj okazas ĉiujare, la duan dimanĉon de januaro. Dum tiu dimanĉo kvestantoj kolektados diversmaniere monon en urboj, urbetoj kaj vilaĝoj por subteni kuracadon de infanoj. Okazas tiam koncertoj, piknikoj, aŭkcioj de valoraj donacitaj aĵoj kaj diversaj aliaj aferoj. La volontuloj surstrate donacas al ĉiu doninto ruĝan koron – algluaĵon kiun homoj algluas sur siajn vestaĵojn. Dum tiu ĉi eksterordinara tago oni malofte trovas sur la strato homon sen algluita simbolo de la Orkestro. Tiu ĉi jare volontuloj kvestas por infanoj kun kanceraj malsanoj. La Pola Televido (la dua televidkanalo) prezentas dum tago elektitajn urbojn en kiu koncertas la Orkestro. Tiu ĉi jare ĝi koncertas ankaŭ en mia urbo!